आफै फस्ने डरले सन्दीप लामिछानेको पक्षमा लेखेको प्रमाेदकाे ट्वीट डिलिट

रेडियो दर्पण संवाददाता

३० भदौ, काठमाडौं ।

नाबालिकलाई ब’लात्कार गरेकाे अभियोग लागेका राष्ट्रिय क्रिकेट टिमका निलम्बित कप्तान सन्दीप लामिछानेप्रति सदासयता देखाउँदै गरेको ट्वीटका कारण गायक प्रमोद खरेलको आलोचना भएको छ।

गायक खरेलले बुधबार राति ट्वीट गरेर ब’लात्कार अभियोग लागेका सन्दीपप्रति सहानुभूति देखाएका हुन्। केही समयभित्रै उनले सो ट्वीट हटाएका थिए। तर, सामाजिक सञ्जालमा उनको सो ट्वीटको स्क्रीनसट साझा भएको छ। धेरैले उनको आरोपितको पक्षपोषण गर्ने टिप्पणीको आलोचना गरेका छन्।

क्रिकेटका फ्यानका रूपमा लिइने गरेका गायक खरेलले ट्वीटमा लेखेका थिए, ‘मानौँ ऊ अन्तर्राष्ट्रिय आ’तंकवादी हो, केही तत्व (सबै हैन) हात धोएर लाग्या छन्। कानुनी प्रकिया पुर्‍याएर काम गरे त हुन्छ होला, जे सजाय पाउने हो पाउँछ नै यदि दोषी भए।

देशको झण्डा छातीमा बोकेको मान्छेलाई होहल्ला नगरी आवश्यक कानुनी प्रकियामा जाँदा कसैको केही बिग्रन्छ र? कि कसो?’सन्दीपलाई कानुनी कारवाहीको दायरामा ल्याउनका लागि भएका मागलाई गायक खरेलले उनको विरुद्ध ‘हात धोएर’ पछि लागेको जस्तो भन्दै अन्तर्राष्ट्रिय स्तरको आ’तंककारीजस्तो व्यवहार भएको जनाएका छन्।

सन्दीपमाथि लागेको ब’लात्कार अभियोगका सम्बन्धमा कलाकारिता क्षेत्रका केही प्रतिनिधिपात्रका टिप्पणीहरू आपत्तिजनक देखिएका छन्। आरोपितप्रति सहानुभूति देखाउने क्रममा उनीहरूले पीडितको न्यायको पक्षलाई बेवास्ता गरेको जस्तो देखिएको छ। यस्तो बिबधित अभिव्यक्तिले आफुलाई नै अप्ठेरो पर्न सक्ने बुझेर उनले त्यो ट्वीट हटाएका थिए

उनीहरूका टिप्पणीले पीडितलाई थप पीडा दिने र आरोपित अपराधलाई ढाकछोप गर्न सहयोग गर्ने भन्दै आलोचना भइरहेकाे छ। नायिका रीमा विश्वकर्मा, कलाकार सन्तोष पन्त, गायक शिव परियारसहितले सन्दीप जोडिएको मुद्दामा पीडितमाथि नै प्रश्न उठाउने खालका टिप्पणी गरेका छन्।

सन्दीपमाथि १७ वर्षीया किशोरीलाई पटक-पटक ब’लात्कार गरेको अभियोग लागेको छ। प्रहरीले उनीविरुद्ध पक्राउ पूर्जी जारी गरेको छ भने अध्यागमनले उनलाई कालोसूचीमा राखेको छ। क्रिकेट खेल्नका लागि क्यारेबियन देश गएका उनी हालसम्म स्वदेश फर्किएका छैनन्।