शुक्रकीटको गुण बढाउन गोलभेँडा उपयोगी !

Posted on: February 03, 2020 | views: 278

काठमाडौं ।


प्रायजसो हामी गोभेँडा अचार र सलादका रुपमा प्रयोग गर्छौ । तरकारी स्वादिलो बनाउन पनि गोलभेँडाको प्रयोग हुने गर्छ । हाम्रो भान्सामा दैनिक प्रयोग हुने गोलभेँडा जिब्रोको स्वादका लागि मात्र नभई यसले स्वास्थ्यमा महत्वूर्णं भुमिका समेत खेलिरहेको हामीलाई थाहा नहुन सक्छ । 


गोलभेँडामा पाइने लाइकपीन नामक पोषक तत्वले पुरुषमा शुक्रकीटको गुण बढाउने एउटा अनुसन्धानले देखाएको छ । प्रत्येक दिन गोलभेँडाको दुई चम्चा गाढा लेदो सेवन गर्ने स्वस्थ पुरुषमा गुणात्मक रूपमा राम्रो शुक्रकीट बनेको पाइएको छ ।  

सन्तान जन्माउन नसक्ने दम्पतीमध्ये आधाजसोमा पुरुषमा बाँझोपन भएको पाइन्छ । विज्ञहरुले पुरुषमा हुने बाँझोपनको समस्याबारे थप अध्ययन हुनुपर्ने औँल्याएका छन् । एनएचएसले गर्भाधानको सम्भावना बढाउन यथासम्भव तनाव घटाउन तथा महिलाको अण्डोत्सर्जनको बेलामा यौन सम्पर्क गर्न सुझाव दिएको छ । तर केही पोषक तत्त्वले पुरुषमा पुंसत्व बढाउने अवधारणा केही समययता प्रबल रुपमा देखिएको छ ।


पहिला पहिला गरिएका अनुसन्धानहरू भिटामिन ई र जिङ्कको प्रभावमा केन्द्रित थिए । तिनमा जस्तै लाइकपीनमा पनि कोषलाई अक्सिजनबाट हानि पुग्न नदिने एन्टीअक्सिडन्ट गुण हुन्छ । यो तत्वले हृदयरोग र केही प्रकारका क्यान्सरको जोखिम घटाउन सघाउने देखिएको छ ।


खाद्यपदार्थमा पाइने लाइकपीन सोस्न शरीरलाई गाह्रो हुने भएकाले यो अध्ययनमा सहभागी मानिसलाई अतिरिक्त ल्याक्टोलाइकपीन दिइएको थियो । त्यसरी प्रत्येक पुरुषले उही मात्रामा उक्त तत्त्व पाएका थिए । उही मात्रामा लाइकपीन पाउन प्रत्येक व्यक्तिले पकाएको दुई किलो गोलभेँडा खानुपर्ने हुन्थ्यो ।


बाह्र हप्ता चलेको परीक्षणमा ६० जना सहभागी भएका थिए । प्रत्येक पुरुषलाई प्रत्येक दिन १४/१४ मिलिग्राम ल्याक्टोलाइकपीन दिइएको थियो । यो अध्ययन लाइकपीन उत्पादन गर्ने कम्पनीले आंशिक आर्थिक सहयोग उपलब्ध गराएको थियो ।

उनीहरूको शुक्रकीट अध्ययनको प्रारम्भमा, छ हप्तामा र अन्तिममा जाँचिएको थियो। शुक्रकीटको परिमाणमा भिन्नता नभए पनि अतिरिक्त लाइकपीन सेवन गरेका व्यक्तिमा स्वस्थ शुक्रकीट र तिनको गतिशीलताको अनुपात बढेको पाइयो । यूनिभर्सिटी अफ शेफील्डसँग आबद्ध पोषणविद् डा. लिज विलीअम्जको नेतृत्वमा भएको शोध युरोपियन जर्नल अफ न्यूट्रिशनमा प्रकाशित छ । ‘तत्काल पुरुषलाई हामीले दिन सक्ने सुझाव धेरै कम छ’, उनले भनिन् ‘हामी उनीहरूलाई मदिरा सेवन घटाउन र स्वस्थकर खानेकुरा खान भन्छौँ ।’


उनका अनुसार अब पुंसत्वसम्बन्धी समस्या भएका पुरुषमा यो परीक्षण गरिनुपर्छ । त्यसबाट लाइकपीनले शुक्रकीटको गुण बढाउन तथा जोडीहरूलाई गर्भाधान गर्न तथा बाँझोपनसम्बन्धी महँगो उपचारविधिबाट जोगिन सघाउँछ कि सघाउँदैन त्यो देखाउन सक्नेछ ।

Share your thoughts!