दशैँको लागी खसी किन्दैहुनुहुन्छ ? जानिराख्नुहोस् स्वस्थ खसी कसरी छान्ने ?

Posted on: September 25, 2019 | views: 693

काठमाडौं, ८ असोज ।


दशैं आएपछि नेपालमा मासुको विक्री ह्वात्तै बढ्छ । थोरै उपभोग गर्ने वा आर्थिक स्थिति कमजोर भएकाहरु तौलेर मासु किन्छन् भने धेरै उपभोग गर्नेहरु खसी नै ढाल्छन् ।


मासु मानिसका लागि महत्वपूर्ण पौष्टिक आहार पनि हो । तर, मान्छेका लागि मात्र नभएर किटाणुका लागि पनि यो उत्तिकै पौष्टिक हुन्छ । त्यसैले मासुको सेवन गर्दा स्वस्थतामा ध्यान दिइएन भने मानिसका लागि विष खाए भन्दा कम हुँदैन ।


मानव शरीरमा किटाणूको सबैभन्दा छिटो आक्रमण मासुकै कारण हुन्छ । त्यसैले दशैंको मासु उपभोक्ताका लागि स्वस्थकर हुनु जरुरी छ । मासुलाई गोठदेखि ओठसम्म पनि भन्ने गरिन्छ । गोठबाट विभिन्न प्रक्रिया हुंदै ओठसम्म आईपुग्दा यसको दूषित मात्रा कम हुनु जरुरी छ ।


किसानले गोठमा पालेको वस्तु उपभोक्ताले कुनै पनि तरिकाबाट मासुको रुपमा प्राप्त गर्दा स्वस्थ हुनुपर्छ । पहिलो त किसानले निरोगी पशु बजारमा पठाउनु पर्छ ।


सामान्यतया घरमा पालेको पशु स्वस्थ छ कि छैन भन्ने ज्ञान किसानलाई हुन्छ । तथापि ठूलो चाड र पैसा आउने भएकाले यो समयमा रोगी पशुहरु पनि बजारमा आईपुगेका हुन्छन् । मासुको धरै माग हुने ठूला शहरहरुमा टाढा–टाढादेखि ढुवानी गरेर खसीबोका लगायतका पशु ल्याईदा उनीहरु बिरामी पर्ने, मर्ने गर्छन् ।


त्यसैले खसी किन्दा उपभोक्ता सचेत हुनु अति आवश्यक छ । पहिलो त किन्ने खसी अस्वस्थ हुन सक्छ भने दोस्रो पसलबाट किन्ने मासु पनि त्यस्तै हुनसक्छ । स्वस्थ खसी के र कस्तोलाई मान्ने ? पसलबाट किन्ने मासु स्वस्थ छ कि छैन कसरी थाहाँ पाउने । यहाँ तपाईंका लागि केही टिप्स दिइएको छ:


स्वस्थ खसी कसरी छान्ने ?

बाहिरबाट हेर्दा टाठो देखिने

उभिएको छ र फूर्तिकासाथ हिंडडुल गर्न सक्ने

आखाँबाट कचेरा ननिस्कीएको

नाकबाट सिंगान नबगेको

मुखबाट र्‍याल नझारेको

खुट्टाहरु नसुन्निएको, भुँडी नढाडिएको

सामान्य रुपमा दिशा पिसाब गर्ने गरेको

बाख्रा प्रजातीको औषत तापक्रम १०२ देखि १०४ सम्म हुने भएकाले तपक्रम छामेर पनि कति स्वस्थ छ अनुमान लगाउन सकिन्छ

राम्रोसंग घाँस–पात पिठो खाने

दूब्लो खसीको मासु स्वास्थकर हुन्छ ।

ढुवानीकर्ताले कसरी स्वस्थ खसी ग्राहकसम्म पुर्‍याउने ?

खाजा–पानी र दिसा–पिसाव गरेर यात्रा गर्ने मानिसलाई त यात्रा अवधिभर तनाव र अस्वस्थता रहन्छ भने पशु स्वस्थ रहने कुरै भएन । लगानी गरेर ल्याएका वस्तु नास हुने अवस्था नआउनका लागि र उपभोक्तालाई राम्रा वस्तु बेच्नका लागि पशुको ढुवानी पनि स्वस्थकर हुनु पर्छ । त्यसका लागि निम्न कुराहरुमा ध्यान दिनुपर्छ ।


किसानबाट खरिद गरेको पशुलाई आरामसँग वधशाालसम्म पुर्‍याउनु पर्छ

सार्वजनिक सवारी साधनको डिकी, छत वा भित्र कहिँ पनि राखेर पशु ढुवानी गर्नु हुँदैन

यात्रा अवधिभरमा ठाउँ–ठाउँमा रोकेर पशुलाई घाँस–पात खुवाउने तथा आराम गराउने गर्नुपर्छ । यात्रा गराएर ल्याउने बितिक्कै पशुलाई बध गर्नु हुन्न

यात्राकै क्रममा बिरामी भएका पशु छन् भने त्यसलाई उपचार गरेर मात्रै बध गरिनु पर्छ

बध गरिनु २४ घण्टा अगाडिबाट पशुलाई अन्न खान नदिए राम्रो तर पानी खुवाउन मिल्छ

खसीको निश्चित आयु नभएकाले कुनै न कुनै कारणले उ मर्छ भने त्यो कारण हानिकरक नै हुन्छ । मरेका वस्तुको मासु मानिसको स्वास्थको लागि पनि हानिकारक मानिन्छ

स्वस्थ मासु कसरी चिन्ने ?

पसलबाट मासु किनेर खानेहरुले स्वस्थ मासु कसरी चिन्नु पनि उत्तिकै महत्वपूर्ण हुन्छ । मासु स्वस्थ भए नभएको मूख्य गरेर मानवीय ज्यानेन्द्रीयबाटै जान्न सकिन्छ ।


मासु गन्हाएको वा नगन्हाएको सुँघेर थाहा पाइन्छ

मासुबाट सेतो पानी बगेको वा मासु चिप्लो भए नभएको हेरेर पनि जान्न सकिन्छ । धेरै दिनदेखिको बासी मासु राम्रो फ्रीजिङ नभएको अवस्थामा त्यस्तो हुन्छ

कहिलेकाहीँ कालो वा धेरै निलो भएको अवस्थामा मासु बिग्रीएको प्रष्टै देख्न सकिन्छ

काटेको मासु डिप फ्रिजमा राखेको छैन भने त्यो मासु पनि स्वस्थ नरहन सक्छ ।



Share your thoughts!